Home > Uncategorized > “አስከሬኑ” ከምሽቱ 3 ሰዓት ላይ ይገባል! (Abe Tokichaw)

“አስከሬኑ” ከምሽቱ 3 ሰዓት ላይ ይገባል! (Abe Tokichaw)

“አስከሬኑ” ከምሽቱ 3 ሰዓት ላይ ይገባል!

ዛሬ አወራችኋለሁ ብዬ አስቤ የነበረው ትላንት ማታ በኢትዮጵያ ቴሌቪዥን ስለተመከትኩት “የሊዝ አዋጁን እና የመሬት ወረራን” የሚመለከት ፕሮግራምን አስመልክቶ ነበር። ፕሮፌሰር መስፍን እና ፕሮፌሰር መረራ ጉዲና የተሳተፉበትን ይሄን ፕሮግራም ሳይ “መንግስት እየተቀየረ ነው እንዴ!?” የሚል ሀሳብ በልቤ ውስጥ ተፈጥሮ ነበር። ፕሮፌሰር መስፍንም ሆኑ ፕሮፌሰር መረራ ኢህአዴግን ልክ ልኩን ሲነግሩት በኢቲቪ ተመልክቼ እንዴት ነው ነገሩ!? ይሄ አዲሱ መንግስት…? በሚል ጥያቄ ላደርቃችሁ ቆርጬ ተነስቼ ነበር። በጠዋቱ ጠሚው አረፉ ተብሎ ጨዋታችን “ዳይቨርት ተደረገ እንጂ”

የሆነ ሆኖ አዎን መንግስት እየተቀየረ ነው። “ከቶ አይቀርም ሞቱ ምንም ቢታክቱ” እንዲል በገና ደርዳሪ ጠቅላይ ሚኒስትር መለስ ዜናዊ ትላንት አንቱ የተባሉትን ያህል  ዛሬ “አስከሬኑ” ተብለዋል። ከዛም አልፎ “አንተ” ተሰኝተው “አስከሬን ሶስት ሰዓት ላይ ይገባልና ተቀበሉት” ተብሎ ተለፈፏል አሉ።

እዚች ጋ ቅድም ስለ ጠቅላይ ሚኒስትሩ ባወራሁት “እጅግ ጨዋነት የተሞላው” ወሬ በርካታ ወቀሳዎችን አስተናግጃለሁ። እንዴት እሳቸው ሞተው ሳለ አንተ እንዲህ እያልክ ትፅፋለህ? ብለው ሊቆጡኝ የሞከሩም አሉ። እንደው አንዳንዱ ሰው “ከኔ በላይ አዛኝ ላሳር” ማለት ይወዳል! ወይስ በፌስ ቡክ ላይ በሚለጠፍ አስተያየት፤ የሚሰጥ የስራ እድገት አለ? አይታወቅም እኮ አንዳንድ ጊዜ አፈፃፀም ላይ ከሚገኙ መገምገሚያዎች አንዱ በፌስ ቡክ ላይ ምን አስተያየት ሰጥተሃል? የሚል ሊሆን ይችላል።

እንጂ በእውነቱ በተቻለኝ አቅም “ለአስከሬኑ” ክብር ስል ከአጓጉል ትችት እና ወቀሳዎች ራሴን አቅቤ ትህትና የተሞላው ወሬ ለማቀበል ሙከራ እያደረግሁ ነው።

በነገራችን ላይ ኢትዮጵያ ቴሌቪዥንን የሚያቀብለኝ ዲሽ  ምን እንደሆን እንጃ ዝም ብሎ የሆነ ጥቁር ነገር ነው የሚያሳየኝ። እኔማ መጀመሪያ አካባቢ እንግዲህ ከሀዘን መግለጫ ዘዴዎች መካከል አንዱ ይሆንላ ብዬ እንባዬን እየተናነቀኝ ዝም ብዬ የጠቆረውን ቴሌቪዥኔን አፍጥጬ ስመለከት ነበር። ኋላ ላይ በኢንተርኔት በኩል ወደ ኢቲቪ ብሄድ ግዜ ጥቁር በጥቁር የለበሰ ጋዜጠኛ “ብፃይ መለስ…” እያለ ጠቅላያችን ስላደረጉልን በረከት ውዳሴ ሲቀርብ ፤ ቀጠል አድርጎም  ጠቅላይ ሚኒስትራችን ነብሳቸውን ይማረውና፤ “እንኳን ከእናንተ ተፈጠርኩኝ…” የሚለውን ዲስኩር በትግርኛ ሲያሰሙ  ተመለከትኩ! ለካስ ቴሌቪዥኔ ተበላሽቶ ነው የጠቆረው እንጂ በሀዘኑ ምክንአት አየደለምና…!

በነገራችን ላይ ከክልል እስከ አዲሳባ ከሴት እስከ ወንድ ያሉ ጋዜጠኞቻችን ጥቁር ልብሱን ከመቼው አሰፉት። ወይስ እስከዛሬም ዜናው ያልተነገረን ልብሱ እስኪደርስ ነበር!? (ውይ የኔ ነገር እንዲህ ያለ ትችት ዛሬ ላላቀርብ ወስኜ ነበር… ይቅርታ አድርጉልኝ ተፀፅቻለሁ!)

ለማንኛውም አስከሬኑ ዛሬ ሶስት ሰዓት ከቦሌ አየር ማረፊያ አራት ኪሎ ቤተመንግስት ድረስ ጉዞ ያደርጋል! ዋናው የመጣሁት ይቺኑ ወሬ ለማቀበል ነበር ስንቱን አወራሁት!?

Categories: Uncategorized
  1. No comments yet.
  1. No trackbacks yet.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: